Mulo sa kahinay sa agas sa tubig sa Brgy. Bugo giaksyonan sa Public Utilities

GIHATAGAN og pagtagad sa komite sa Public Utilities ni konsehal Eric Salcedo ang reklamo sa mga residente sa Villa Trinitas Phase 3 Taparak Barangay Bugo ning syudad mahitungod sa kahinay sa agas sa tubig.

Gireklamo usab sa mga residente nga adunay panahon nga masinati nila ang walay agas sa tubig sa ilang dapit nga nakahatag og purwisyo kanila.

Atol sa tigom sa komite niadtong milabayng adlaw, gibutyag ni Engr. Kim Perido, representante sa Cagayan de Oro Water District, nga kamulo na og trabaho ang ilang Booster Pump nga ana-a nahimutang sa barangay Bugo ug hayan sa dili madugay mobalik na ang normal nga supply sa tubig sa maong dapit.

Nunot niini nga impormasyon, gikalipay sa mga molopyo ang maong pahibalo sa COWD samtang nagpadangat usab sa iyang pagpasalamat si Konsehal Eric Salcedo sa daling aksyon nga gihimo sa mga kawani sa COWD. (MLR/SP)