Hangyo sa sitio Cabag-asan, Brgy. Bugo nahatagan og temporaryong solusyon

MALAUMON si Konsehal Eric Salcedo, chairman sa komite sa public utilities, nga matabangan ug mahatagan sa temporaryong supply sa tubig ang mga residente sa Sitio Cabag-asan, Barangay Bugo ning syudad pinaagi sa pagbutang og Public Faucet sa Cagayan de Oro Water District (COWD).

Kini human gihangyo ni Salcedo ang COWD atol sa tigom sa komite alayon sa maong katuyuan diin dugay nang gihangyo sa  mga residente sa maong dapit.

Nasayran nga gatusan ka pamilya sa maong dapit ang nag-antos sa walay supply sa tubig ug nagpaabot nga maaprobahan ang ilang aplikasyon nga makutayan sa tubig.

Gipasabot ni Salcedo sa mga residente nga gipaningkamotan sa goberno local lakip na ang konseho sa barangay Bugo nga makutayan sa tubig ang ilang dapit.

Gani, aduna nay pundo nga gigahin alang  niini nga proyekto aron masugdan na kini sa pag-trabaho.

Nunot niini, gipasalamatan ni Konsehal Eric Salcedo ang mga kawani sa COWD sa paghatag og tukmang aksyon sa maong mulo. (MLR/SP)