Pagsaulog sa Pagpamuhat 2026 nagmabulokkon

MABULUKON nga   gisaulog ang "Pagpamuhat 2026" diha sa City Museum, usa ka mahinungdanong lakang nga nagtumong sa pagpreserbar ug pagpasidungog sa lumad nga kultura sa dakbayan. 

Ang maong kalihokan hugot nga gisuportahan ni Indigenous Peoples Mandatory Representative (IPMR) Konsehal Roberto Cabaring, uban sa mga IPMR sa barangay ug mga Limbobongan sa komunidad.

Usa sa pinakasentro  sa maong okasyon mao ang opisyal nga pag-angkon sa "Bangkasu"—ang sagrado ug tradisyonal nga lamesa sa ritwal sa mga Higaonon nga gikan mismo sa kasingkasing sa komunidad sa mga Lumad.

Ang Bangkasu himoon nang permanenteng eksibit sa City Museum aron mapalalom ug mapalapad pa ang pagsabot sa publiko ug sa mga mosunod nga henerasyon mahitungod sa mabulukong kulturang Higaonon sa Cagayan de Oro.

Matod pa sa buhatan ni IPMR Cabaring, dako ang ilang kalipay ug garbo sa maong inisyatiba tungod kay kini naghatag og tingog ug dungog sa ilang kagikan.

Nagtuo usab ang konsehal nga pinaagi sa pagbutang sa Bangkasu sa museyo, mas maprotektahan ang ilang mga tradisyon ug mapasa ang mithi sa ilang katigulangan ngadto sa mga kabatan-onan.

Mitambong usab sa maong makasaysayanong kalihokan ang nagkadaiyang lider sa siyudad ug mga kaubang ahensya lakip na ang City Social Welfare and Development (CSWD) Office, Cagayan de Oro City Gender and Development (GAD) Office, ug mga representante gikan sa Philippine Air Force (PAF), nga nagpakita sa hiniusang pwersa sa pagsuporta sa katungod ug kultura sa mga Lumad. (JRG/SP)