Digital weighing scale calibration drive sugdan sunod bulan

SUGDAN sa Septiyembre 1, ning tuig ang mandatory calibration ug verification sa digital weighing scales nga gigamit sa tanang mamaligyaay diha sa pribado ug publikong kamerkadohan ug uban pang establisemento sa negosyo sa syudad, matod ni Konsehal George Christopher Goking, chairman sa komite sa trade and commerce.

Ang maong lakang gitumong aron makab-ot ang mas hapsay nga pagpatuman sa transition period human gi-amendar ang Section 10 sa Ordinance No. 15378-2026 kon Digital Weighing Scale Ordinance.

Gipasabot ni Goking nga igo na kini nga panahon nga ang mga mamaligyaay makapangandam sa pagtuman ug pag-ilis sa ilang mechanical ug analog nga timbangan sa awtorisado nga digital o electronic nga timbangan sa dili pa ang Oktubre 16, ning tuig.

Alayon niini, gipasalamatan ni Konsehal Goking ang kagamhanan sa dakbayan sa pagpanguna sa buhatan sa City Treasurer's Office (CTO)-Tax Mapping Division ug sa City Information Office sa ilang gilunsad nga information drive sugod niadtong Agosto 1 alang sa mandatory calibration ug verification ug sa hingpit nga pagpatuman sa digital weighing scale ordinance.

Giaghat ni Konsehal Goking ang mga market vendors sa pagduaw sa buhatan sa City Treasurer's Office sa City Hall kon aduna silay mga pangutana bahin sa maong ordinansa alang sa katin-awan.  (RNQ/SP)