Digital weighing scale ordinance sa dakbayan giuyonan sa konseho

GILANTAW nga mahatagan og kasigurohan ang matag konsumedor nga makakuha sa husto nga kantidad ug husto nga gibug-aton sa ilang gipamalit diha sulod sa kamerkadohan ug uban pang establisemento sa dakbayan.

Kini human hiniusang giuyonan sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang Ordinance No. 15378-2026 nga giila isip Digital weighing scale ordinance sa dakbayan.

Ang maong ordinansa nag-require sa tanang mamaligyaay diha sa pribado ug publikong kamerkadohan ug uban pang establisemento sa negosyo sa paggamit sa duly calibrated ug verified nga digital o elektronic nga mga timbangan alang sa mga transaksyon nga naglambigit sa pagtimbang.

Mahinumdoman nga gihingusgan kini ni Konsehal Christopher George Goking, chairman sa komite sa trade and commerce, alang sa paghatag sa klaro ug patas nga pagpamaligya ug pagpanalipod sa mga konsumedor.

Matod ni Goking nga ang maong ordinansa maoy resulta sa sunod-sunod nga committee hearings ug konsultasyon ug uban sa mga personahe sa buhatan sa Department of Trade and Industry (DTI), City Economic Enterprises and Business Development Administration (CEEBDA), Cagayan de Oro City Price Coordinating Council (CdOCPCC), City Legal, Market Vendor Associations, Mayor Rolando Klarex Uy, ug uban pang stakeholders aron masiguro nga balanse ug makatarunganon ang implementasyon niini.

Ang patas nga timbangan dili lang sukdanan sa produkto, kundili sukdanan usab sa pagsalig ug integridad sa negosyo, sumpay ni Konsehal Goking. (RNQ/SP)