Annual Budget sa Indahag giuyonan sa Konseho

Padayong gisuportahan sa Konseho sa syudad ubos ni Bise Mayor Bebot Rodriguez ang mga programa ug proyekto sa Barangay Indahag.

Sa ilang sesyon niadtong Lunes, paborableng giuyonan sa konseho ang resolusyon nga nag- aprobar sa 2026 Annual Budget sa Indahag nga adunay banabanang kinitaan ug galastohon nga P30 milyones gikan sa Enero ngadto sa Disyembre.

Tipik sa gipundohan sa maong budget ang mga proyekto nga nasulod sa ilang 20-porsyentong development fund ug mga programa  sa  Sangguniang Kabataan.

Samtang migahin usab ang barangay og igong pundo alang sa pagpangandam sa kalamidad  nga gilangkoban sa pagpahigayon sa mga trainings sama sa fire drill, aqua drill, ug earthquake drill, pagpalit og supplies nga magamit panahon sa kalamidad, pag-refill sa mga fire extinguishers ug oxygen tank, pagpalit og mga medisina, pagpalit og supply sa pagkaon ingon man pagtul-id sa ilang evacuation center.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlou Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)