2026 budget sa Kauswagan giaprobahan

DUGANG kalamboan ug de kalidad nga serbisyo  ang gilaumang matagamtaman sa katawhan sa Barangay Kauswagan ning dakbayan.

Kini human ang konseho sa sesyo niadtong Lunes nga gidumala  ni Bise Mayor Bebot Rodriguez hiniusang misagop sa resolusyon nga nag-uli sa ordinansa sa maong barangay nga may kalabotan sa ilang 2026 Annual Budget nga adunay bana-banang kinitaan ug galastohon  nga mokabat sa P 65,099,803.

Ubos sa maong budget, migahin ang barangay og igong kantidad  alang  pagpasemento sa dalan nga adunay drainage diha sa Zone 5 Olape Compound, pagtukod og multipurpose building, pagkoral  sa health center, pagtukod og drainage sa covered court diha sa Zone 4 ug Don Mariano Compound.

Dugtong niini, migahin usab ang barangay og igong kantidad alang sa  pagpahigayon og training kalabot sa pagpangandam sa kalamidad, pagpalit og dumptrucks, rescue vehicle, calamity related supplies ug uban pa.

Ang resolusyon nga gisagop sa Konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ni Konsehal Edgar Cabanlas. (JRG/SP)