Updated: Jul 6
GIPAHIBALO ni Konsehal Eric Salcedo, chairman sa night market management committee (NMMC), nga temporaryong suspendihon ang operasyon sa night market sa mga bahin sa Justo Ramonal Street ug Osmena Street sa Cogon Area sugod sa Lunes, Hunyo 22, 2026 hangtod nga adunay bag-ong pahibalo gikan sa komitiba.
Kini human nauyonan atol sa tigom sa komite nga gipahigayon niadtong Hunyo 3, 2026 diha sa buhatan sa CEEBDA.
Sumala ni Salcedo nga ang temporaryong pagpahunong sa maong operasyon resulta sa nagkadaghang kalapasan sa pagpatuman sa mga lagda sa night market.
Lakip sa nakitang kalapasan mao ang pagsupak sa gitugot nga oras sa pagpamaligya gikan sa alas 6:00 sa gabii hangtod alas 5:00 sa buntag lamang, pag-okupar sa dalan nga dili gitugotan nga baligyaan nga maoy hinungdan nga misamot ang kahuot sa dagan sa trapiko, paggamit sa mga lamesa ug tent nga mas dako kaysa gitugot nga sukod ug ang dili paghipos sa mga basura.
Gikonsidera usab ang mga insidente sa kagubot sa Cogon Area nga misangpot sa pagpanghulga batok sa mga sakop sa Roads and Traffic Administration (RTA).
Niini gihangyo ni Konsehal Eric Salcedo ang pagsabot sa mga mamalig-ay kay ang maong lakang alang man sa kasegurohan sa tanan. (MLR/SP)
Updated: Jul 6
GIPAABOT nga konsiderahon sa komite sa barangay affairs sa Konseho ubos ni Konsehal Marlo Tabac ang ordinansa nga gipalabang sa Konseho sa Barangay Macabalan nga mag-regulate sa polusyon sa kasaba sulod sa ilang barangay.
Kini human giduso ni Bise Mayor Bebot Rodriguez ngadto sa maong komite ang Ordinance No. 09-2026 kon Barangay Macabalan Noise Pollution Control Ordinance of 2026 alang sa dugang pagtuon ug tukmang aksyon.
Ang ordinansa nagtumong sa pagpalambo sa kahimsog, kaluwasan, kaharuhay, kasayon, ug kinatibuk-ang kaayohan sa mga lumulupyo pinaagi sa pag-regulate sa sobra ug wala kinahanglana nga kasaba nga makatugaw sa kalinaw sa komunidad.Giila sa barangay nga ang sobrang kasaba gikan sa karaoke machines, loud speakers, loud music ug giusab nga mga muffler nga makabalda sa pagtuon sa mga tinun-an, sa pagkatulog, sa kalinaw ug makapadaot sa kalidad sa kinabuhi sa mga residente niini. (RNQ/SP)
Updated: Jul 6
GITINGUHA ni City SK Federation President Konsehal Kenneth John Sacala nga madungog ug makonsiderar gayod ang tingog sa kabatan-onan diha sa pagplano alang sa kalamboan.
Sa gipahigayong ika-10 nga regular session sa Oro Youth Development Council (OYDC) sa milabyang semana, gibutyag sa konsehal nga magpadayon ang council nga magsilbing mahinungdanong plataporma nga diin ang mga idea mamahimong aksyon sa pagsiguro nga ang tingog sa kabatan-onan mao ang sentro sa lokal nga kalamboan.
Samtang gitutukan usab atol sa maong tigom ang pag-align sa kasamtangang mga inisyatibo aron nga mas labing matubag ang inadlaw adlaw nga panginahanglanon sa kabatan-onan sa dakbayan.
Niini, gipasabot ni Sacala nga sa pagpanguna sa maong diliberasyon gitumong aron ang matag-batan-on adunay suporta ug kahigayonan nga sila molambo. (JRG/SP)