Pag regulate sa paggamit sa karaoke, videoke sa kabarangayan gihingusgan

GIHINGUSGAN sa komite sa Public Order and Safety, komite sa Barangay affairs og sa komite sa trade and commerce ang pag-amendar sa ordinansa no. 4373-94 Section 614 kun Noise Regulation Ordinance sa syudad.

Kini human sa mga reklamo sa katawhan nga walay gisubay nga limitasyon sa oras sa paggamit sa videoke diha sa mga residential area sa kabarangayan nga maoy hinungdan nga nakahatag kini og disturbo sa mga molopyo panahon sa lawom na nga kagabion.

Sumala sa obserbasyon ni konsehal Roger Abaday chairman sa komite sa Public Order and Safety nga adunay pipila ka mga magpapatigayon sa syudad nga dili soundproofed ang ilang establismento diin nakahatag usab kini og kapurisyo sa katawhan.

Lakip sa gisugyot atol sa tigom sa komite mao ang kutob lamang sa alas-10 sa gabii ang paggamit sa karaoke sa mga residential area og kun adunay special nga okasyon sama sa Birthday,Bunyag og uban pa kinahanlan mananghid sa Barangay Kapitan dala sa barangay certification.

Nunot niini nga sugyot gihanyo ni Abaday ang mga nagkadaiyang opisina sa goberno nga mosumite sa ilang mga sugyot og rekomendasyon aron hugot kining tun-an sa komite alang sa nasangpit nga katuyuan.

Malaumon si konsehal Roger Abaday nga sa sunod tigom sa komite hingpit nang mahan-ay ang rekisitos nga gikinahanlan sa maong ordinansa aron hingpit kining ipatuman sa labing dali nga panahon. (MLR/SP)