Bigaan River gisusi sa komite ni Salcedo

MALAMPUSONG gipahigayon ang ocular inspection diha sa Bigaan River nga nahimutang dool sa Sekyup Ilaya, Purok 4 Barangay Gusa ning dakbayan.

Ang maong inpeksyon may kalabutan sa hangyo ni Reynante Namocatcat alang sa dredging ug excavation operations diha Bigaan River aron nga mapanumbalik ang natural nga kahimtang sa suba ug nga maminusan ang mga pagdahili sa yota nga nakaapekto usab sa mga propedad.

Nasayran nga buot ni Namocatcat nga mapalawoman kining porsyon sa maong suba  tungod nag-anam ka mabaw tungod sa mga pagdahili ug pagtagaktagak sa yuta gikan sa ibabawng bahin labina panahon nga kusog nga pagbaha.

Sumala pa nga kon kini mapalawoman gilantaw nga mapanumbalik ang normal nga estado niini gawas nga improbar pa gyod pagdaloy sa tubig.

Niini, si konsehal Salcedo nisugyot sa buhatan sa City Engineers Office (CEO), City Local Environment and Natural Resources Office (CLENRO), Depatment of Public Works and Highways (DPWH), ug City Disaster Risk Reduction and Management Office (CDRRMO) sa pagduso sa ilang komento ug rekomendasyon sa umaabot nga tigom nga himoon sa Agosto 19 ning tuig. (JRG/SP)