HINGPIT nang maplastar ang kasabotan diha sa paghimo og hiniusang plano alang sa makiangayon ug luwas nga kaugmaon sa dakbayan ug masiguro niini ang pagbalhin ngadto sa mas limpyo nga enerhiya nga makahatag og kaayohan sa tanang Kagay-anon.
Kini human ang konseho sa sesyon niadtong Lunes nga gidumala ni Bise Mayor Bebot Rodriguez mipalabang og ordinansa nga naghatag katungod ni Mayor Rolando Uy isip mayor sa dakbayan sa pagpirma sa Memorandum of Understanding (MOU) tali sa Institute for Climate Change and Sustainable Cities (ICSC) nga gipresentahan sa ilang executive director Angelo Kairos T. De la Cruz kalabot sa pagtinabangay sa pagtukod og kinatibuk-ang gambalay sa pagpauswag sa kalamboan nga lig-on batok sa klima ug pagpaspas sa makiangayong transisyon sa enerhiya para sa kaayohan sa tanang Kagay-anon.
Sa maong kasabotan giila sa isigka-ka partido ang kahuyang sa Pilipinas batok sa mga katalagman sa kinaiyahan ug sa pagbag-o sa klima; ang nasud maoy nag-una isip labing daling maigo sa kalamidad, nga nag-atubang og taas nga risgo sa baha, mga bagyo, ug epekto sa pagbag-o sa klima base sa World Risk Report sa 2025.
Tuyo sa maong kasabotan nga sulbaron ang krisis sa klima ug paspason ang makiangayong transisyon pinaagi sa pagpasiugda sa mga solusyon nga ubos sa carbon ug renewable energy pinaagi sa pag-research og mga datos alang sa pagpalambo sa kapasidad ug pagkompleto sa Cagayan de Oro Local Energy Plan lakip na ang paghikay sa "clean energy transition road map."
Ang ordinansa nga gipalabang sa konseho alang sa maong katuyoan gipaluyohan sa komite sa environment ni Konsehal Eric Salcedo ug komite sa pamalaod ug reglamento ubos ni Konsehal Edgar Cabanlas. (JRG/SP)
Updated: Aug 7
MADAWAT sa mga kawani ug opisyal sa City Hall ang usbaw sa ilang suholan nga nasulod sa third tranche salary increase schedule.
Kini human hiniusang giuyonan sa konseho atol sa sesyon sa Lunes nga gidumala ni Bise Mayor Bebot Rodriguez ang 2026 Supplemental Annual Investment Program (SAIP) No. 4 nga mobalor ₱171,755,592.00.
Kini naglakip sa mga gitagana alang sa Programs, Projects, and Activities (PPAs) sa dakbayan aron matubag ang mga mga panginahanglanon sa kalamboan sa siyudad, pagsiguro sa paghatod sa serbisyo publiko, ug pagsuporta sa RISE CDO agenda sa kagamhanan.
Nahiuyon usab kini sa tumong ug prayoridad nga gilatid sa mga plano diin ang maong mga proyekto gilantaw nga makatabang dinha sa paghatag sa dugang kaarangan sa kinabuhi sa matag Kagay-anon.
Tipik sa gipundohan sa SAIP No. 4 mao ang pagpatuman sa 3rd tranche sa sweldo alang sa tanang mga opisyal ug empleyado sa lokal nga kagamhanan sa dakbayan sa Cagayan de Oro subay sa Department of Budget and Management (DBM) Local Circular Budget No. 172 kon Implementation of the Third Tranche of the Updated Salary Schedule for Local Government Personnel Pursuant to Executive Order (EO) No. 64, s. 2024’ nga gi-isyu niadtong Hulyo 16, ning tuig.
Ang maong lakang gi-certify nga dinalian ni City Mayor Rolando A. Uy human sa makuting pagtuki sa City Development Council subay sa CDC Resolution No. 11 (S.2026).
Dako ang paglaom ni Bise Mayor Rodriguez nga ang maong tranche magsugod sa umaabot Septembre subay sa salary standardization law sa nasud. (RNQ/SP)
HINIUSANG giuyonan sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga naghatag pasidungog kang Col. Manuel Estanilla, ang Commanding Officer sa Task Force Oro tungod sa iyang dedikasyon sa pag-abag sa dakbayan aron mamintinar ang kahusay ug kalinaw sa syudad.
Nasayran nga sa kanunay, ang Task Force Oro sa Philippine Army ang gaabag sa pagpatrolya palibot sa syudad uban sa Cagayan de City Police Office aron masiguro ang seguridad ug mapatunhay ang kahusay og kalinaw sa syudad, ilabi na sa mga dagkong kalihokan sa Dakbayan sama sa pagsaulog sa kapistahan.
Sumala ni konsehal Roger Abaday, chairman sa Committee sa Public Order and Safety, nga si Col.Manuel Estanilla ma-destino na sa laing dapit ug angayan lang nga hatagan og dakong pasidungog tungod sa iyang dakong natabang sa pagdumala sa Task Force Oro.
Ang resolusyon nga gipalabang sa konseho alang sa maong katuyoan gipangamahanan ug gipaluyohan sa komite sa public order and safety ni Konsehal Roger Abaday. (MLR/SP)