Salcedo mihatag og lugway aron tun-an pagpatuman sa ordinansa sa trapiko

GIHANGYO ni Konsehal Eric Salcedo, chairman sa komite sa public utilities, ang transport sektor ug mga sumasakay sa syudad sa pagsabot, nunot na usab sa paglugway sa laing usa ka bulan sa pagpatuman sa ordinansa sa trapiko sa Dakbayan.

Kini ang pamahayag ni Salcedo atol sa gihimong tigom sa komite niadtong milabayng adlaw diin gihangyo niini ang kooperasyon sa tanang sektor sa katilingban ug pagsabot sa mga pamaagi sa goberno nga mapagaan sa dagan sa trapik ug sa hingpit nga pagpatuman sa Local Public Transport Route Plan (LPTRT) sa syudad.

Sumala ni Konsehal Salcedo nga isip chairman sa maong komite, gilantaw niya ang kaayohan alang sa tanan ug subay sa lagda sa balaod sa syudad.

Dugang sa konsehal nga gikalipay niini ang sugyot nga mag-mugna og Joint Multi-Sectoral Task Force nga gilangkoban sa opisina sa Roads and Traffic Administration, Land Transportation Franchising and Regulatory Board LTFRB-10, transport sector ug mga sumasakay aron tun-an nga makaayo sa goberno ug sa sektor sa tranportasyon ug mga sumasakay.

Malaumon si Konsehal Eric Salcedo nga pinaagi sa panaghiusa ug panagtinabangay hingpit nga makab-ot ang tukmang solusyon. (MLR/SP)