Salcedo nangandam sa pagpatuman sa LPTRP sa Dakbayan

MALAUMON si Konsehal Eric Salcedo, chairman sa komite sa public utilities, nga mahan-ay na ang tanan alang sa pagpatuman sa Local Public Transport Route Plan (LPTRP) sa syudad sa umaabot July 21 ning tuig.

Kini ang gipahibalo ni Salcedo atol sa tigom sa komite uban sa tanang transport sektor, mga magpapatigayon, ug sa mga nagkadaiyang ahensya sa gobyerno.

Nagtuo ang konsehal nga human sa taas nga panahon nga gihatag sa opisina sa Roads and Traffic Administration (RTA) ug uban pang buhatan sa gobyerno lokal aron tun-an ang maong modernized program, mapatuman na gayod kini sa hingpit.

Nasayran nga nauktaba ang pagpatuman sa LPTRP sa milabayng tuig tungod sa reklamo sa mga traditional jeepney driver ug operator nga napihig sila sa rota tungod sa layo nga biyahe apan susama lang ang pletehan ug nalakip sa ilang rota ang pipila ka hinterland barangays nga dili na makaya kay daan na ang ilang mga sakyanan hinungdan nga temporaryong gipahunong ni Mayor Rolando Klarex Uy ang pagpatuman sa LPTRP alang sa dugang pagtuon.

Nanghinaot si Konsehal Eric Salcedo nga masabot  sa katawhan ug paluyohan ang maong programa tungod ug alang sa kalamboan sa atong nasud ug sa dakbayan. (MLR/SP)