Salcedo gikahingawa ang nasinating kakulangon sa suplay sa tubig sa NMMC

GIHANGYO ni Konsehal Eric Salcedo, chairman sa komite sa public utilities, ang mga kadagkoan sa Cagayan de Oro Water District (COWD) nga  aksyonan sa labing dali nga panahon ang nasinating problema sa kakulangon sa supply sa tubig diha sa Northern Mindanao Medical Center (NMMC).

Kini human gipadangat ni Dr. Alvin Quinon, medical chief sa maong balay-tambalanan, ngadto sa komite ang maong problema.

Gibutyag ni Dr. Quinon nga walay supply sa tubig ang ilang main water line sugod niadtong Pebrero ning tuig. Siya nabalaka nga kini makabalda sa operasyon sa maong tambalanan.

Atol sa tigom sa komite sa milabay’ng adlaw, nagpadayag sa kabalaka ang mga opisyal sa maong hospital tungod kay moabot sa singko mil kapin ka mga pasyente ang ilang giatiman ug ang tubig maoy pinaka-importante sa ilang matag adlaw nga pagserbisyo.

Alayon niini, ang mga kawani sa COWD nagpasalig nga ilang hatagan sa pagtagad ang maong problema. (MLR/SP)