Saktong impormasyon sa mga transaksyon sa botika gihingusgan ni Goking

BUOT ni Konsehal George Christopher Goking, chairman sa komite sa trade and commerce, nga ang tanang botika sa syudad mag-post sa mga impormasyon nga nagdetalye sa pribilehiyo sa diskwento sa senior citizens ug PWDs, mag-andam og sinsilyo sa sentimos, maghatag og accessible nga mga mekanismo sama sa hotline, email address, ug opisyal nga social media account nga matubag dayon kon ugaling adunay mga reklamo.

Kini ang unod sa taho ni Konsehal Goking atol sa sesyon niadtong Lunes nga gidumala ni Bise Mayor Bebot Rodriguez.

Gipasabot sa konsehal nga adunay pipila ka mga isyu nga nadani ang iyang atensyon lakip niini ang mga insidente sa kulang nga sukli (0.10 hangtod 0.90 sentimos), kapakyasan sa paghatag sa gikinahanglan nga diskwento (walay booklet apan adunay ID), sayop nga pagkwenta sa diskwento, ug kakulang sa accessible nga paagi sa pagreklamo o kakulang sa kahibalo unsaon ug asa moadto para magreklamo.

Matod ni Goking nga daghang konsumedor ang nagpahayag sa ilang kabalaka nga kinahanglan kini matagaan og aksyon kay bisan og gamay ra kini nga kantidad, apan kung moabot na kini sa libo-libong transaksyon matag adlaw, dako na gyud kini nga kantidad.

Kini nga inisyatiba maghatag og klaro nga paagi aron ang mga konsumedor makareport sa ilang reklamo ngadto sa hustong ahensya sama sa Department of Trade and Industry, Food and Drug Administration, Department of Health, ug uban pa, sumpay ni Goking. (RNQ/SP)