Resolusyon alang sa temporaryong pag-suspenso sa construction sa overpass giuyonan

MAYORIYANG giuyonan sa Konseho sa Syudad ubos sa pagdumala ni Bise Mayor Bebot Rodriguez ang resolusyon nga nagduso alang sa temporaryong pagpahunong sa proyekto nga overpass nga gitrabaho sa Department of Public Works and Highways (DPWH) diha sa uptown area nga maoy hinungdan sa dugang kapiot sa dagan trapiko.

Si Konsehal Eric Salcedo, chairman sa komite sa public utilities, mipadangat sa iyang special report atol sa sesyon niadtong Lunes mahitungod sa maong isyu ug iyang nasuta nga ang  poste sa maong proyekto nakasulod sa dalan nga mahimong makaapekto sa mga motorista ug maoy hinungdan nga masinati ang problema sa trapik sa nasangpit nga dapit.

Gikabalaka sa konsehal nga kon hingpit kining mapadayon sa pag-trabaho, mahimong mosamot ang problema sa trapiko dihang dapita.

Niini gisugyot ni Konsehal Eric Salcedo nga dapiton sa komite sa public works ni Konsehal Al Legaspi ang kadagkoan sa DPWH aron hisgotan ug mapangitaan sa tukmang aksyon ug solusyon.

Ang resolusyon nga gipalabang sa konseho alang sa maong katuyoan gipangamahanan ni Konsehal Eric Salcedo. (MLR/SP)