Presensya sa sundalong Amerikano sa syudad di angay kabalak-an –Abaday

DILI angay mabalaka ang katawhan  sa presensya sa mga Amerikanong sundalo nga ana-a karon sa Lumbia air base ning syudad.

Kini ang gisiguro ni Konsehal Roger Abaday, chairman sa komite sa public order and safety, agig reaksyon sa gipadangat nga special report ni Konsehal Edgar Cabanlas atol sa sesyon niadtong Lunes nga gidumala ni Bise Mayor Bebot Rodriguez mahitungod sa maong isyu.

Sumala ni Abaday nga ang pagpahigayon sa pagbansay-bansay aron mapalig-on ang kahanas alang humanitarian assistance ug disaster response preparedness maoy katuyoan sa mga langyawng sundalo dinhi sa syudad.

Siya midugang nga motabang usab ang maong mga langyaw sa pagtukod og mga tulunghaan sa pipila ka barangay diin lakip sa makapahimulos niini mao ang barangay sa Lumbia, Indahag, Carmen ug uban pa.

Suportado usab ni Abaday ang sugyot ni Cabanlas nga dapiton sa sunod sesyon sa konseho ang mga opisyal sa Philippine Air Force, Commanding General sa 4ID Philippine Army, Philippine National Police ug mga opisyal sa Department of the Interior and Local Government (DILG).

Niini malaumon si Konsehal Roger Abaday nga mapasabot sa mga hintungdang ahensya ang pipila ka butang nga gustong pakisayran sa mga opisyal sa syudad bahin sa maong isyu. (MLR/SP)