top of page

Pagpalambo sa ekonomiya sa CDO padayong gitinguha - Goking


Si Konsehal George Goking, maoy mirepresentar sa dakbayan sa gipahigayong “Usapang Pangkapayapaan, Usapang Pangkaunlaran” (UP-UP) dinhi sa Amihanang Mindanao nga gipasiugdahan sa Tactical Operations Group (TOG) - 10 CMO.


Sa maong kalihokan, si Goking mipadayag sa tahas sa mga Komite sa Trade and Commerce ug Ways and Means nga iyang gidumala nga nagdala sa serbisyo ug mga programa aron mapalambo ang ekonomiya sa syudad. Lakip niini mao ang pagpatuman sa Ease of Doing Business ug pagmugna sa usa ka palibot nga haum alang sa mga lokal ug langyaw nga mga negosyante.

Siya midugang nga ang syudad naningkamot nga maka-agni og mga imbestor nga mobobo sa ilang patigayon alang sa dugang kalamboan sa ekonomiya.


“Gikinahanglan usab nga mawagtang ang red tape aron daghan ang mosalig sa pagbubo sa ilang kapital. Malantaw ug maila ang kabililhon sa mga tahas sa micro, small ug medium enterprises (MSMEs) sa pagpadagan sa lokal nga ekonomiya,” sumpay ni Goking.


Matod niya nga andam siyang mosuporta pinaagi sa pagpahigayon sa capacity-building workshops, financial assistance ug kahigayonan sa market access aron mapalig-on ang mga MSMEs. Gipasabot usab ni Goking ang konsepto sa “Smart City” diin ang mga transaksyon sa mga merkadong pampubliko cashless na ang sistema sa pagbayad. Ang maong pamaagi makadogang sa hapsay ug dayag nga transaksyon dinha sa merkado. Si Goking usa ka aktibo nga CPT Philippine Air Force Reservist.

Comments


bottom of page