Pagpahigayo’g derby kinahanglan dili molapas 2 ka adlaw - Abbu

“SECTION 739 sa Codified Ordinance nag-ingon nga ang derby kausa lang sa usa ka bulan ug dili molapas sa duha ka adlaw ang pagahimoong sabong  sa mga lisenyadong cockpit gawas kon adunay pagsaulog sa kapistahan sa barangay o syudad.”

Kini ang punto sa pakisayod ni Konsehal Joey Abbu, Jr., Chairman sa Komite sa Labor, atol sa sesyon niadtong Lunes nga gidumala ni Bise Mayor Bebot Rodriguez human gituki ang gitakdang 3-day cock derby diha sa Canitoan-Pagatpat Cockpit Arena sa Marso 13-15 ning tuig.

 “If we will approve the proposed ordinance, the request of which is 3 days, then it will be violative (of) the legal opinion of the City Legal.”

Dugang pa ni Konsehal Abbu nga uyon siya sa maong ordinansa, apan iyang gisugyot nga ipahigayon kini sa duha lamang ka adlaw.

Sa iyang bahin, si Konsehal Roger Abaday, Chairman sa Komite sa Games and Amusement, mipasabot nga sumala sa iyang nasayran, ang usa ka adlaw gigahin sa mga sabongero pagpangandam og pagparis sa ilang mga manok igsabongay.

Samtang si Konsehal Romeo Calizo, Chairman sa Komite sa Public Order and Safety, mipasabot  nga gawas nga legal ang maong sabong kay ipahigayon man kini atol sa kapistahan  sa ilang patron St. Joseph, makadugang usab  kini sa  kinitaan sa syudad  ug  mahatagan pa sa hingpit nga  seguridad ang mga sabongero.

Niini, hiniusang gipalabang ang ordinansa  alang sa maong katuyoan nga gipaluyuhan sa tanang sakop sa konseho.