Abbu nahingawa sa problema sa supply sa tubig

“WATER supply just like other public utilities is imbued (with) public interest.”

Kini ang pamahayag ni Konsehal Joey Abbu, Jr. atol sa sesyon sa Konseho niadtong Lunes nga gidumala ni Bise Mayor Bebot Rodriguez agig reaksyon sa special report ni Konsehal Ian Mark Nacaya kabahin sa nasinating problema sa supply sa tubig sa ubang dapit sa syudad.

Gipasabot sa konsehal nga ang tubig usa sa pinakaimportante nga gikinahanglan sa komunidad maong nabalaka siya sa epekto sa kasamtangang problema tali sa Cagayan de Oro Water District (COWD) ug Cagayan de Oro Bulk Water Inc. (COBI).

Mahinumdoman nga ang konseho una nang misagop og Resolution No. 14854-2024 nga nagmugna sa AdHoc Committee nga maoy gitahasan pagtuon sa kontrata tali sa COWD ug Metro Pacific ug ang Lease Contract tali sa COWD ug Cagayan de Oro Bulk Water Inc. (COBI).

Niini, gisugyot ni Konsehal Abbu nga ma-imbestigahan ug matagaan sa tukmang solusyon ang maong problema sa daling panahon sa tinguha nga dili na maglisod sa supply sa tubig ang katawhan sa dakbayan.