Pag-amendar sa Ease of Doing Business Ordinance padayong gitun-an

PADAYONG gitun-an sa komite sa trade and commerce ubos ni Konsehal George Christopher Goking ang lakang pag-amendar sa Ordinance No. 13992-2020 nga naila isip Ease of Doing of Business Ordinance sa dakbayan.

Kini human naghatag og opinyon ug rekomendasyon atol sa miaging tigom ang representante sa mga hintungdang buhatan sa City Hall kabahin sa pagpahamtang sa uniform rate nga P1,000 alang sa barangay clearance fee bisan pa man nga sa ilang ordinansa, managlahi ang gipahamtang nga rates ang matag barangay.

Atol sa maong tigom, giklaro ni Konsehal Jonjon Rodriguez, kinsa maoy nangamahan sa maong lakang, nga magpabilin nga ang syudad ang magkolekta sa maong clearance fees.

Sa iyang bahin, si Konsehal Marlo Tabac hugot nga misugyot sa pag-revisit sa maong ordinansa sa tinguha nga masolosyonan kini nga problema sa tanang barangay kay sa kasamtangan, daghang nakapending nga sugyot ordinansa kabahin sa mga bayranan.

Niini, gitahasan sa komite nga magtigom pag-usab ang mga sakop sa Technical Working Group (TWG) alang sa dugang pagtuon sa maong lakang ug magpahigayon og compulsory workshop sa tanang barangay sa siyudad uban sa personahe sa buhatan sa City Finance, City Legal ug City Treasurer aron matubag kun epektibo ba kini nga lakang ug sa ingon maplastar ug mapatuman ang tanang ordinansa sa barangay.

Ang maong sugyot ordinansa gipangamahanan usab nila ni Bise Mayor Bebot Rodriguez, Konsehal Marlo Tabac ug George Christopher Goking.

Ang maong tigom gitambongan usab nila ni Konsehal Aga Suan, Yvy Emano ug Imee Moreno. (RNQ/SP)