Pagbalik sa business registration plate gisugyot ni Konsehal Goking

GIHINGUSGAN ni Konsehal George Christopher Goking, chairman sa komite sa trade and commerce, nga mapatuman ang General Welfare Clause ug mapalig-on ang Consumer Protection Laws.

Kini human nakigtagbo ang konsehal sa kadagkoan sa buhatan sa City Treasurer, City Accounting, Business Permits and Licensing Department ug Oro Trade and Investments Promotion Center aron hisgotan ang planong pagbalik sa paggamit sa business registration plate dinhi sa dakbayan.

Kini nga lakang gihimo aron masiguro ang tulubagon sa mga negosyo, mapalambo ang transparency, ug aron dali ra mailhan sa pumapalit kon lehitimo ba ang establisemento sa dakbayan.

Matod ni Goking ang pagpanalipod sa mga konsumedor usa ka importante nga responsibilidad sa lokal nga pangagamhanan.

Pinaagi sa saktong pag-ila sa negosyo ug pagsunod sa mga legal nga patakaran, makatabang kita sa pagpalig-on sa pagsalig sa publiko diha sa mga pamatigayon, ug paghatag og dugang kadasig ug kompiyansa sa katawhan diha sa ilang mga transaksiyon.

Dako ang pagpasalamat ni Goking sa mga hintungdang buhatan sa ilang partisipasyon ug walay hunong nga kooperasyon aron mapaduso kining maong lakang.

Padayon kita sa pagpalig-on sa mga lakang nga nagtinguha sa kaayohan sa katawhan ug sa atong lokal nga komunidad sa negosyo, sumpay sa konsehal. (RNQ/SP)