National Bible Day sa dakbayan gitinguhang masaulog

“HAPPY National Bible Day to all”.

Mao kini ang pahibalo ni Konsehal John Kenneth Sacala, Chairman sa Komite sa Sports and Youth Development, atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Gipahibalo ni Sacala nga gideklara ang matag katapusang Lunes sa Enero matag tuig nga special working holiday subay sa RA 11163 kun National Bible Day Act.

Matod ni Sacala nga kini usa ka tinuig nga kalihokan nga gisaulog aron pagpasidungog sa mga pulong sa Diyos pinaagi sa pagbasa sa Bibliya, pagbaton og Bibliya, ug pag-apod-apod sa mga Bibliya ngadto sa katawhan.

Niini, iyang giaghat ang katawhan nga mahimong kabahin unta ang pagbasa sa Balaang Basahon kansang mga pulong naghatag og instrumento alang sa lig-ong espirituhanong pundasyon sa kinaiya dinha sa pagkab-ot sa maayong pagpanginabuhi.

Gipahibalo usab sa konsehal nga siya nag-apod-apod og Bibliya alang niadtong gustong makabaton ug mahimong modangop diha sa iyang buhatan.