Nakahan-ay nga programa, proyekto sa Brgy. 8 mapatuman na

MAHIMO nang ipatuman sa Barangay 8 ang ilang mga nakahan-ay nga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Presiding Officer Pro Tempore Councilor Romeo V. Calizo, misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastuhon balor P3,381,554.00.

Lakip sa gipundohan mao ang 20 porsyentong (20%) development fund balor P 343,328.00; samtang P 338,155.00 usab ang gigahin alang sa pagpatuman sa mga programa sa Sanguniang Kabataan; P 169,078.00 alang sa Barangay Risk Reduction Management fund; P 17 mil sa programa sa Senior Citizens ug PWDs; P 200,000.00 alang sa pag Declogging sa ilang mga canals ug uban pang mga programa nga gilantawng maghatag ug dugang kaarangan sa ilang serbisyo sa ngadto sa katawhan.

Ang 2024 annual budget sa barangay 8 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam Lim ug sa Komite sa Pamalaod ni konsehal Edgar Cabanlas.