Programa, proyekto sa Brgy 8 mapatuman na

Hingpit nang mapatuman sa Barangay 8 ang ilang mga programa ug proyekto karong tuiga. Kini human ang Konseho sa syudad sa sesyon kagahapon nga gidumala ni Bise Mayor Jocelyn Rodriguez misagop og resolusyon nga nag-uli sa ordinansa sa barangay diin nasukip ang ilang Supplemental Budget No. 1 (SB1) nga adunay gibanabanang kinitaan ug galastohon balor P3,426,641.00.

Tipik sa gihatagan og prioridad nga mapatuman sa maong dugang budget mao ang pagpalit og supplies ug ekipo nga magamit panahon sa kalamidad, pagrehabilitar sa drainage system, pagsemento sa dalan ug mga programa alang sa Sangguniang Kabataan.

Ang resolusyon nga gipalabang sa konseho alang sa imong katuyuan gipaloyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ed Cabanlas.