Mga programa, proyekto sa Bugo mapatuman na

MAPATUMAN na sa Barangay Bugo ning syudad ang ilang mga gitinguhang programa ug proyekto karon tuiga.

Kini human ang Konseho sa Syudad sa sesyon niadtong Lunes  nga gidumala ni Bise Mayor Bebot Rodriguez misagop og resolusyon nga nag-uli sa ordinansa sa maong barangay  nga may kalabutan ang ilang 2024 Annual Budget nga adunay gibana-banang kinitaan ug galastohon balor P38,078,086.

Tipik  sa ilang gihatagan sa  prayoridad  mao ang pagrehabilitar sa ilang  health center, pag-instalar og suga sa kadalanan, pagtul-id sa Multi-purpose Building – Bantay Dagat Docking Area, pagfabricate sa  mga garbage containers ug pagrehabilitar sa kadalanan sa barangay.

Dugang niini, migahin usab ang barangay og igong pundo  alang pagrehabilitar sa drainage ug canals  gikan sa Zone 1-8, paghinlo  sa storm drainage canals sa  barangay, pagrehabilitar sa day care centers gikan sa Zone 1-8, igong pundo alang sa mga progama ug proyekto sa Sangguniang Kabataan ingon man sa kalamidad ug daghan pang uban.

Ang resolusyon nga gisagop sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ug Reglamento ubos ni Konsehal Edgar Cabanlas.