top of page

Mga programa, proyekto sa Brgy. Canitoan mapatuman na


HAYAN mapatuman na sa Barangay Canitoan ang ilang gihan-ay nga mga programa ug proyekto nga gipundohan karong tuiga.



Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibana-banang kinitaan ug galastuhon nga mobalor sa P39,734,570.


Lakip sa gipundohan mao ang 20 porsentong (20%) Development Fund sa kantidad nga P6,814,492; samtang P3,973,457 usab ang gigahin alang sa pagpatuman sa mga programa sa Sangguniang Kabataan; P1,000,000 alang sa pag-rehabilitar sa ilang Multi-Purpose Hall Annex sa Zone-2 Canitoan; P1,000,000 ang gigahin alang sa pagpalit og lote nga tukoran para sa ilang Multi-Purpose Hall Annex B; P200,000 alang sa pag-instalar sa street lighting sa Zone-1 hangtod sa Zone-10 ug uban pang mga programa nga gilantaw’ng maghatag kaarangan sa ilang serbisyo ngadto sa katawhan.


Ang 2024 annual budget sa Barangay Canitoan miagi sa makuting pagtuon sa mga Komite sa Konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.

Comentários


bottom of page