Mga botika gihangyo pagpost sa saktong impormasyon sa mga transaksyon

GIHINGUSGAN ni Konsehal George Christopher Goking, chairman sa komite sa trade and commerce, ang pagpanalipod sa katungod sa mga konsumedor, ilabi na sa sektor sa senior citizens (SC) ug persons with disability (PWDs).

Mahinumdoman nga si Konsehal Goking mitaho sa miaging sesyon sa konseho nga unta ang tanang botika sa syudad mag-post sa mga impormasyon nga nagdetalye sa pribilehiyo sa diskwento sa mga senior citizens ug PWDs, mag-andam og sinsilyo sa sentimos, maghatag og accessible nga mga mekanismo sama sa hotline, email address, ug opisyal nga social media account aron matubag dayon kon ugaling adunay mga reklamo.

Sa sesyon niadtong Lunes nga gidumala ni Majority Floor Leader Konsehal Edgar Cabanlas, hiniusang giuyonan sa konseho ang resolusyon nga naghangyo sa Department of Health (DOH) sa pagmando sa tanang botika sa pagpost og klaro nga mga impormasyon nga nagpahibalo sa SC ug PWD sa ilang mga katungod, sa hustong paghatag sa diskwento ug sukli, sa tukmang detalye alang sa mga reklamo nga maglakip sa hotline, email, FB page ug ang pagsilot niadtong mga botika ug uban pang establisemento nga dili motuman niini.

Kini nga lakang maghatag og mas klaro nga paagi sa pagduso sa mga reklamo ug magpalig-on ang transparency ug accountability sa mga establisemento, samtang gipanalipdan ang katungod sa matag konsumedor, sumpay ni Konsehal Goking. (RNQ/SP)