Konseho mihangyo sa COFD pag-organisar og BFI

GILANTAW nga hingpit nang ma-monitor ang electrical wiring systems sa kabalayan sa mga informal settlers  sa syudad.

Kini human ang konseho sa sesyon niadtong Lunes nga gidumala ni Bise Mayor Bebot Rodriguez misagop og resolusyon nga nag-awhag sa Cagayan de Oro City Fire District (COFD) pag-organisar ingon man pagbansay og Barangay Fire Inspectors (BFI) sa matag barangay aron tahasan pagsusi sa hustong  pag-instalar  sa electrical  wiring system  sa panimalay  sa  mga informal settlers ingon man  sa mga lugar nga delikado sa sunog subay sa Ordinance No. 14173-2021.

Gisugyot usab nga apilon ang mga estudyante sa kolehiyo ug unibersidad nga may kalabotan sa programa nga  mopaubos sa on-the-job training isip kabahin sa BFI.

Sa maong resolusyon, gipasabot nga dako og ikatabang ang BFI sa pagregulate sa hustong pag-instalar sa electrical wiring system samtang gipaninguha usab nga ma-promote ang pagsunod sa safety standards ingon man ang  mga lakang  nga maminusan  ang  peligro sa sunog.

Sumala pa, ang kolaborasyon tali sa COFD, barangay, tunghaan ug  komunidad  makapalig-on  sa paningkamot nga malikayan ang sunog.

Ang resolusyon nga gisagop sa konseho alang sa maong katuyoan gipaluyohan sa tanang sakop sa konseho.