Konsehal Esparcia pabor sa sugyot ordinansa pagpreserbar sa local product sa Bulua

PABOR si Konsehal Bernie Esparcia, chairman sa Komite sa Climate Change, sa pagpanday og ordinansa nga magpreserba ug mag-ila sa produkto sa Bulua nga banga o’ kolon.

Kini ang reaksyon  sa konsehal sa special report ni Konsehal Girlie Balaba  sa sesyon sa konseho niadtong Lunes nga gidumala ni Bise Mayor Bebot Rodriguez nga misugyot pagpanday og ordinansa nga mapreserbar  sa lokal nga produkto sa barangay.

Gani, nahingawa ang konsehal human iyang nasayran nga sa dugayng panahon wala pay napalabang nga ordinansa alang sa maong katuyuan hinungdan iya kining gisuportahan aron sa maong paagi mahimo silang makapahigayon og Pot Festival.

Gipahinumdum usab ni Esparcia ang iyang sugyot ordinansa nga One Barangay, One Product nga diin sa Bulua mao ang banga samtang sa Lumbia mao usab ang kasoy.

Niini,  gipadayag sa konsehal ang iyang suporta sa sugyot ni Balaba aron hingpit nga mapreserbar ang mga lokal nga produkto ug matabangan ang mga gagmayng magpapatigayon sa dakbayan.