Goking naninguha mapatuman sa hingpit CDO Ease of Doing Business Law

PADAYON si Konsehal George Goking nga naninguhang mapatuman sa hingpit ang balaod nga naglatid alang sa pagpasayon sa pagnegosyo dinhi sa dakbayan sa Cagayan de Oro. Ang konsehal kasamtangang mitambong sa Forum on Economic and Ease of Doing Business (EODB) didto sa kaulohan.

Tumong sa maong panagtigom ang hugot nga pagpatuman sa Akta Republika No. 11032 kon “Ease of Doing Business and Efficient Government Service Delivery Act of 2018” nga nagmando sa pagpatuman ug paglantaw sa palisiya sa nasud kontra red tape ug sa tinguha nga mapalambo ang ekonomiya sa nasud.

Si Secretary Frederick Go sa Office of the Special Assistant for Investment and Economic Affairs (OSAPIEA) maoy usa sa mga mipresentar sa mga programa ug lakang alang sa pagpalambo sa ekonomiya dala ang mga pamaagi nga mapasayon ang pagnegosyo aron makab-ot ang paborableng business environment.

Ang mga mitambong sa panagtigom gilangkoban sa mga representante sa Chamber of Commerce to the Philippines: William Bailey, British; Edward Ling, Malaysia; Daniel Alexander, Presidente sa Australian-New-Zealand; Julian Payne, President ug CEO sa Canada Chamber of Commerce; Dr. Cecilio Pedro, Presidente sa Filipino-Chinese Chamber of Commerce and Industry, Inc.; Paulo Duarte, Presidente sa Europe Chamber of Commerce; Rex Daryanani, Presidente sa India Chamber; Shigeru Shimoda, Japan; Hyunchong Joseph Um, Korea; Bo Lundovist, Nordic; Yoray Ofek, Israel; Christopher Zimmer, Germany; Ebb Hinchliffe, America; Carl Matrin Faannessen, Norway; Raymundo Talimio, Jr. CPA, MBM, Presidente sa Cagayan de Oro Chamber of Commerce and Industry Foundation, Inc. ug uban pang mga representante sa lain laing sektor nga nalambigit sa negosyo. Dako ang pagsalig ni Goking nga kini magdala og dakong kalamboan sa nasud ug sa dakbayan sa Cagayan de Oro.