Goking midayeg sa pagpatuman sa bag-ong SM mall hours

DAKO ang pagdayeg ni Konsehal George Goking sa SM CDO Downtown sa ilang gihatag nga bag-ong mall hours agi’g suporta sa mga shoppers niining nagsingabot nga pagsaulog sa Pasko. Sa kasayuran nga nahipos sa buhatan ni Goking, nasayran nga nagsugod niadtong Nobyembre 9, 2023 ang pagpatuman sa bag-ong mall hours nga molungtad sa Enero 1, 2024.

Niini, ang 10am-10pm skedyul nagsugod niadtong milabayng weekend, Nobyembre 17, 2023 hangtod sa Nobyembre 19, 2023 ingon man sa umaabot Nobyembre 24, 2023 hangtod sa Disyembre 23, 2023. Samtang masugod usab sa alas 9 sa buntag hangtod sa ala siete sa gabii ang operasyon sa umaabot Disyembre 24, 2023 ug Disyembre 31, 2023

Hinuon, sa Enero 1, 2024 magsugod ang operasyon sa mall sa alas dose sa udto ngadto sa alas dies sa gabii. Si Goking namahayag nga sa gilugwayang mall hours daghan ang mga residente nga mahatagan sa kahigayonan nga makapalit nga dili na usab maapektohan sa kapiot nga dagan sa trapiko.

“Dugang pa, ang mga bisita gikan sa kasikbit nga syudad ug probinsya mahatagan usab sa taas nga panahon sa ilang pagpamalit,” panapos ni Goking.