top of page

Esparcia misugyot matugutan pagpamuhi og baboy sa syudad

Gisugyot ni Konsehal Bernie Esparcia, Chairman sa Komite sa Climate Change, nga makonsiderar ang pagpamuhi og baboy dinhi sa syudad aron matubag ang kakulangon ug kataas sa presyo sa karneng baboy.


Kini ang reaksyon sa konsehal sa special report ni Konsehal Roger Abaday, sa sesyon niadtong Lunes nga gidumala ni Bise Mayor Bebot Rodriguez kalabot sa kakulangon sa supply sa baboy dinhi sa syudad.

Matod niya nga kasagarang gikan sa probinsya sa Zambonga ang tinubdan sa baboy nga mosulod dinha sa syudad human gidid-an sa gobyerno ang pagpasulod sa mga baboy gikan sa mga lugar nga apektado sa ASF.


Gipasabot ni Esparcia nga tungod sa kanihit ug kamahal sa baboy ang uban didto na magpalitson sa ubang lugar aron lang makabarato.


Siya midugang nga iyang nasabtan ang mga lakang nga gipatuman sa City Veterinary Office nga mapugngan ang pagsulod sa baboy dinhi sa syudad gikan sa mga dapit nga adunay ASF.


“Maayo man kini nga lakang apan dako akong panghinaot nga unta makahimo usab ang kagamhanan og programa nga matugutan ang pagpamuhi og baboy kay gawas nga makatabang kini sa kapanginabuhian sa katawhan mas dali kining matutokan,” panapos ni Esparcia.

Comments


bottom of page