Esparcia misugyot maimbestigar hinungdan sa pagbaha sa Bugo

Hugot nga gisugyot ni Konsehal Bernie Esparcia, Chairman sa Komite sa Climate Change, nga maimbistigahan ang hinungdan sa daling pagbaha dinha sa Barangay Bugo panahon nga adunay kusog nga ulan.

Kini ang unod sa iyang special report atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Matod ni Esparcia nga sa unang higayon nasinati sa mga residente sa Bugo ang labihan nga pagbaha niadtdong Hulyo 20, 2023 diin ang tubig nanulod na gayud sa kabalayan tungod kay niawas na sa creek.

Gipasabot sa konsehal nga adunay mga katahap ang ubang residente nga ang dagkong proyekto nga gitukod dinha sa Upper Puerto ang usa sa hinungdan sa nasinating pagbaha. Matod niya nga gidudahang ang tubig sa ulan gikan sa ibabaw’ng bahin didto na padulong sa kabalayan sa Bugo. Hinoon, si Esparcia mibutyag nga maayo ang proyekto apan basin adunay mga lakang nga angayan pang ipatuman aron malikayan ang pagbaha sa ubos nga bahin.

Niini, gihangyo ni Esparcia ang pagpahigayon og hiniusang tigom uban sa Komite sa Public Works aron maimbistigahan ang hinungdan sa maong pagbaha. Ang taho ni Esparcia giduso ni Bise Mayor Bebot Rodriguez ngadto sa Komite sa Climate Change ug Komite sa Public Works ni Konsehal John Michael Seno alang dugang pagtuon ug rekomendasyon.