Esparcia malaumon mapatuman Project Lunhaw dihas Carmen

GIHINGUSGAN ni Konsehal Malvern Esparcia, Chairman sa Komite sa Climate Change Adaptation and Mitigation, nga mapatuman ang Project Lunhaw diha sa Carmen area kay aduna na kini pundo nga gigahin alang sa maong katuyuan.

Kini ang unod sa special report ni Konsehal Esparcia atol sa  sesyon niadtong lunes nga gidumala ni Presiding Officer Protempore Konsehal Edgar Cabanlas.

Nagtuo si Esparcia nga kon ma-implementar kini nga proyekto makahatag  kinig dugang atraksyon sa syudad tungod kay nakita niini ang desinyo nga adunay bike lane, fishing area, walk ways alang sa PWDs ug mahimo pang mabutangan sa mga outdoor sports sama sa baseball, soccer ug basketball, diin dili na angay kabalak-an kay aprob na ang gahin niini,” sumpay sa konsehal.

Niini gisugyot ni Esparcia nga maduso kini sa komite aron mahatagan sa igong aksyon ug rekomendasyon.

Ang maong taho giduso ni Konsehal Edgar Cabanlas ngadto sa komite sa Public Works alang sa dugang pagtuon.