Esparcia dismayado sa kakulangon sa pagpatuman sa balaod

DISMAYADO si Konsehal Bernie Esparcia, Chairman sa Komite sa Climate Change, sa iyang namatikdan nga kakulangon sa pagpatuman sa balaod sa trapiko sa syudad.

Kini ang unod sa special report sa konsehal atol sa sesyon sa Konseho niadtong Lunes nga gidumala ni Bise Mayor Bebot Rodriguez.  Gibutyag sa konsehal ang iyang nabantayan nga kapila na siya makasunod og motorista nga nakalapas sa balaod sa trapiko apan wala siyay nakita nga gasikop niini.

Matod niya nga sa ubang lugar nga iyang naadtoan, kun ang motorista  adunay nahimong kalapasan diha-diha aduna dayon traffic enforcer o’ team  nga gasita ug modakop  sa malapason.

64th Regular Session

“Unsa ug asa ang problema nga lisod man ipatuman ang balaod?”, pangutana ni Esparcia.

Sa iyang bahin, si Konsehal Romeo Calizo midayeg sa taho ni Esparcia ug mibutyag nga katulo na kahigayon nga iyang girepaso ang Traffic Code sa syudad ug iyang namatikdan  nga anaa  sa pagpatuman ang problema.

Niini, si Bise Mayor Bebot Rodriguez miduso sa taho ni Esparcia ngadto sa Komite sa Public Utilities aron mahatagan sa  igong pagtagad ug rekomendasyon.