DPWH gihangyo pagbutang og road signages diha sa Bayanga

DALING giaksyonan sa komite sa public works ni Konsehal Al Legazpi Sr. sa tigom niadtong Mierkoles  ang hangyo nga mabutangan sa Binisaya nga road signage ang dalan  sa Sitio Cabula ug diha dapit  sa Macahambus Cave ning syudad.

Mahinumduman nga si  Konsehal Roberto Cabaring  sa milabay’ng sesyon sa konseho mipadangat sa iyang special report alang sa maong katuyoan gumikan sa sunod-sunod nga aksidente sa nahisgotann dapit nga mikalas og kinabuhi.

Sumala ni Cabaring nga kon mabutangan kini sa Binisaya nga road signages, hayan maminusan ang aksidente  ug maprotektahan ang kinabuhi sa mga motorista nga sagad moagi sa maong dapit.

Hinoon gipasabot sa Department of Public Works and Highways (DPWH) nga aduna nay pundo alang niini ug ila nalang gihulatan ang Special Allotment Release Order (SARO) aron kini mapahimutang.

Niini, si Konsehal Legazpi mihangyo nga samtang nagpaabot pa sila sa pundo alang sa maong katuyoan, angayan mapangitaan nilag paagi nga mabutangan kini sa road signages or safety  device sa labing dali nga panahon. (JRG/SP)