Sunod-sunod nga aksidente diha sa Cabula, Macahambus area gikahingawa ni Cabaring

HUGOT nga gikahingawa ni Konsehal Roberto Cabaring, chairman sa komite sa cultural communities, ang sunod-sunod nga aksidente sa dalan diha sa Sitio Cabula ug diha banda sa Macahambus Cave nga nahimutang sa Barangay Bayanga ning syudad.

Sa iyang special report atol sa sesyon sa konseho niadtong Lunes nga gidumala ni Bise Mayor Bebot Rodriguez, si Cabaring mibutyag nga sa bulan sa Disyembre 2025, sunod-sunod ang nahitabong aksidente sa maong dapit.

Matod sa konsehal nga adunay traffic signage nga naka-instalar sa maong dapit apan gisugyot niya ang pag-instalar sa pinasahi nga matang sa signage nga mapansin gayod sa mga motorista aron sila magmatngon sa ilang pagmaneho.

Nanghinaot si Cabaring nga mapangitaan kini sa paagi sa mga hintungdan ahensya sa gobyero aron maprotektahan ang kinabuhi sa katawhan. (JRG/SP)