Daba nagpasalamat sa malamposong ISLA 2026

KUSGANONG nagpasalamat si Konsehal Jing Daba, chairman sa komite sa edukasyon,  sa dakong kalamposan sa gipahigayong Iskolar sa Dakbayan Leadership Academy (ISLA) 2026 sa miaging semana diha sa Pilgrim College Auditorium.

Ang tinuig nga programa sa kagamhanan nga giandam alang sa mga Iskolar sa Dakbayan gipasiugdahan sa City Education and Development Office (CEDO).

Tumong sa maong kalihokan nga mapakita ang kinaiya ug disiplina sa mga iskolar, mahimong kahigayonan sa panaghiusa ug maandam ang mga scholar-leaders nga makahimo og proyekto o programa aron sa ingon makatabang sila sa panginahanglanon sa ilang tagsa-tagsa ka barangay.

Nasayran nga ang kalihokan nagsentro sa pagpatuman sa programa sa syudad kabahin sa solid waste management ug pagproteher sa kinaiyahan nga gilangkoban sa walo ka proyekto: ReSowlution, Bulig, Bin Barya Build, Rug-repurposing used garments, Iskolar Smart Operation for Recycling and Tracking (I.S.O.R.T.), Iskolars Edukplanting, Bulawanong Bahandi ug Panaad.

Gipasalamatan ni Daba si Mayor Klarex Uy sa pagmugna sa maong academy ubos sa pagdumala ni CEDO Head Richel Petalcurin-Dahay uban ang suporta sa Gawad Kalinga- Central Office, Couples for Christ (CFC)- Gawad Kalinga, Konsehal Des Dahino, Konsehal John Sacala, Silver Eagles Club, Virginia Foods Inc., ug Dunkin Donuts.

Gipahalipayan usab ni Konsehal Daba ang 180 ka Iskolar sa Dakbayan sa ilang kakugi, kadasig, ug dedikasyon sa pagpasundayag sa ilang tagsa-tagsa ka proyekto. (RNQ

/SP)