Bugo Barangay Tourism Office Ordinance padayong tun-an

BUOT ni Konsehal Marlo Tabac, chairman sa komite sa barangay affairs, nga mahatagan sa daling pagtagad ang mga naka-pending nga mga ordinansa sa kabarangayan sa dakbayan.

Sa miaging tigom, giduso sa komite balik ngadto sa Konseho sa Barangay Bugo ang ilang sugyot ordinansa nga nagmugna og barangay tourism office aron sa pag-refine sa maong ordinansa ug pagsumite pagbalik sa madaling panahon.

Kini human gitahasan ang barangay sa paglakip sa mga rekomendasyon sa buhatan sa City Tourism and Cultural Affairs ilabina ang kabahin sa pundo ug implementasyon ug ang partisipasyon sa barangay tourism council.

Nakita sa barangay nga ang turismo usa ka mahinungdanong bahin sa lokal nga kalamboan ug pagtubo sa ilang ekonomiya.

Nasayran nga ang Bugo adunay potensyal nga mga dapit sa turismo ug kultural nga kabilin.

Si Konsehal Jonjon Rodriguez mibutyag nga adunay panginahanglan sa pag-institutionalize sa barangay tourism office aron mag-abag sa pagpalambo sa industriya sa turismo sulod sa barangay.

Ang maong tigom gitambongan usab nila ni Minority Floor Leader Konsehal Aga Suan ug Konsehal Yvy Emano. (RNQ/SP)