Suan misuporta sa MR-SIA sa siyudad

HUGOT nga gisuportahan ni Konsehal Aga Suan, minority floor leader sa Konseho, ang pagpahigayon ug paglunsad sa Measles-Rubella Supplemental Immunization Activity (MR-SIA) sa tibuok siyudad, nga nagsugod niadtong Enero 19 hangtod Pebrero 13, alang sa mga bata nga nag-edad sa unom ka bulan ngadto sa upat ka tuig ug 11 ka bulan.

Subay niini, nanawagan si Konsehal Aga sa mga ginikanan nga pabakunahan ang ilang mga anak nga nag-edad ug unom (6) ka bulan ngadto sa upat (4) ka tuig ug onse (11) ka bulan aron malikay sa sakit nga tipdas ug rubella nga mahimong mosangpot sa grabeng komplikasyon nga moresulta sa kamatayon.

Matod sa konsehal nga importante kini kaayo nga bakuna aron maprotektahan ang kinabuhi sa gagmayng mga bata.

Libre ug walay bayad ang pagpamakuna diha sa mga vaccination site o pinakaduol nga health center sa ilang tagsa-tagsa ka lugar, pamahayag ni Konsehal Suan. (RNQ/SP)