Bernie nangusog mapangamdaman epekto sa climate change

PADAYONG tun-an sa komite sa Climate Change, Adaptation and Mitigation and Disaster Risk Reduction ni Konsehal Bernie Esparcia ang sugyot ordinansa nga magdeklarar sa state of climate emergency sa dakbayan sa Cagayan de Oro.

Kini gumikan sa giingong kakulangon sa supply sa tubig, pagkaon, enerhiya, yuta ug pagkaylap sa sakit nga resulta sa global anthropogenic climate change. Atol sa tigom, ang representante sa CLENRO mibutyag og updates sa gimugnang Local Climate Change Action Plan (LCCAP) sa dakbayan. Gipasabot nga aduna pay gikinahanglang himoon aron mamugna ang maong plano.

Hinuon, sa kasamtangang adunay Technical Working Group (TWG) diin sakop ang CLENRO ug CDRRMD nga makatabang sa pagpanday sa maong plano. Kini naglakip sa Green House Gas (GHG) nga basihan alang sa mitigation strategy diin ang CLENRO ang nangulo ug Climate and Disaster Risk Assessment (CDRA) nga basihan sa adaptation strategy nga ang CDRRMD ang nangulo.

Ang CDRA nagtutok diha sa mga peligro sa klima, pagbaha ug storm surge samtang ang GHG nagtutok sa populasyon, natural resources, critical facilities, lifeline utilities ug urban use. Ang tanang makuha nga datus mao ang importanteng basihan aron mamugna ang LCCAP.

Dako ang paglaum ni Esparcia nga mapalabang ang balaodnon sa tinguha nga mapangandaman ang epekto sa climate change dili lang sa dakbayan kun dili sa tibuok nasud.