Balaod batok sa improvised mufflers gihingusgan

GIHINGUSGAN ni Konsehal Roger Abaday, chairman sa komite sa public order and safety, nga mapakgang ang pagbaligya sa improvised mufflers aron mahunong na ang paggamit niini sa mga motorista nga nakahatag kapurisyo ug disturbo sa katawhan ilabi na panahon sa kagabhion.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga taliwala nga aduna nay gimugna nga composite team nga gilangkoban sa Roads and Traffic Administration (RTA), Philippine National Police, Land Transportation Office (LTO) batok sa improvised mufflers apan nagpadayon gihapon ang maong matang sa ilegal nga operasyon dinhi sa syudad.

Dugang sa konsehal nga gikinahanglan na ang pagpalabang sa comprehensive local ordinance sama sa ubang mga dagkong syudad sa nasud nga nagtumbok sa pag-regulate ug pagpahamtang sa tukmang silot o multa niadtong nagahimo ug namaligya-ay sa mga improvised mufflers.

Ang maong sugyot ni Konsehal Abaday giduso ni Bise Mayor Bebot Rodriguez ngadto sa komite sa public utilities ni Konsehal Eric Salcedo alang dugang pagtuon ug rekomendasyon. (MLR/SP)