Salcedo mihatag katin-awan sa gipakalat nga sayop niyang pamahayag

GIKLARO ni Konsehal Eric Salcedo, chairman sa komite sa public utilities, nga dili kalabot sa pagkutlo sa kinabuhi ang tuyo sa iyang pamahayag sa pag-ambak sa tulay kun dili ang pagpabugnaw sa ilang utok sa mga troll nga nagpakatag og fake news.

Kini ang pagpasabot ni Salcedo agig reaksyon sa pamahayag ni Konsehal Yvy Emano atol sa sesyon niadtong Lunes nga gidumala ni Bise Mayor Bebot Rodriguez mahitungod sa maong isyu nga miani sa nagkadaiyang reaksyon diha sa social media.

Sumala ni Salcedo nga ang maong pamahayag para lamang sa mga fake pages nga nagpakatag og bakak nga impormasyon batok kaniya ug sa atong gobyerno nga makahatag og dili maayong epekto.

Nunot niini malaumon ug nanawagan  si Konsehal Eric Salcedo sa katawhan nga susihon ug sutaon pag-ayo ang unod sa ipang post diha sa social media ayha motuo ug ipangkatag ang maong impormasyon aron malikayan ang fake news. (MLR/SP)