Abaday nangusog masumpo ang paggamit sa solvent sa minor de edad

TUNGOD sa pagkuyanap sa paggamit sa solvent sa mga minor de edad dinhi sa syudad, gihingusgan ni Konsehal Roger Abaday, chairman sa komite sa public order and safety, nga masumpo kini pinaagi sa hugot nga koordinasyon sa mga barangay officials ug sa City Social Services ingon man ang kapolisan.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez.

Gisugyot ni Abaday ang pagpatuman sa Presidential Decree No. 1619, ang balaod nga nagpahamtang og silot ngadto sa mga malapason.

Siya midugang nga ang dakbayan adunay ordinansa nga nagdili sa mga establisemento sa pagbaligya og rugby ngadto sa mga minor de edad.

Angayan e-monitor sa syudad ang mga establisemento kon nagtuman ba sila niini nga regulasyon tungod kay nagkadaghan ang mga rugby boys sa kadalanan.

Ang maong taho giduso ni Bise Mayor Bebot Rodriguez ngadto sa komite sa barangay affairs ni Konsehal Marlo Tabac ug sa komite sa social services ni Konsehal Maximo Rodriguez alang sa tukmang aksyon ug rekomendasyon. (MLR/SP)