Salcedo nangusog maimbestigar ang operasyon sa COBI sa syudad

GUMIKAN sa gilaraw sa Cagayan de Oro Water District nga omento sa bayronon sa tubig, gitinguha ni Konsehal Eric Salcedo, chairman sa komite sa environment, nga moduso og resolusyon nga maghanyo sa kadagkoan sa National Water Resources Board pinaagi sa ilang Executive Director Atty. Ricky Arsadon nga mohimo sa makuting imbestigasyon ug posibleng aksyon sa operasyon sa Cagayan de Oro Bulk Water, Incorporated (COBI) dinhi sa syudad.

Kini ang unod sa special report ni Konsehal Eric Salcedo atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Salcedo nga lima ka mga butang ang nasuta sa gimugna ni Mayor Rolando Klarex Uy nga special task force for water treatment nga gipangulohan ni Konsehal Edgar Cabanlas niadtong tuig 2024 human nakasinate sa hulga pagputol sa supply sa tubig sa syudad.

Tipik niini ang dili makatarunganon nga pag-usbaw sa bayronon sa tubig matag tulo ka tuig ug ang walay insaktong bulk water treatment ang COBI.

Malaumon si Salcedo nga mahatagan kini sa igong pagtagad tungod kay ang tubig bililhon sa matag adlaw nga panginahanglanon sa katawhan.

Niini mayoriyang giuyonan sa Konseho ang maong resolusyon nga naghanyo sa buhatan sa National Water Resources Board ug sa Local Water Utilities Administration alang sa maong katuyuan. (MLR/SP)

Goking gihingusgan ang pagmonitor sa sub-standard Christmas decors

SI Konsehal George Christopher Goking, chairman sa komite sa trade and commerce, nanawagan nga mamonitor ang naggamit ug nagbaligya sa mga sub-standard electronic Christmas decorations ug sa mga ilegal nga pabuto dinhi sa syudad gikan karong adlawa hangtod sa kasaulogan sa Pasko.

Kini ang unod sa taho ni Goking atol sa sesyon sa Lunes nga gidumala ni Bise Mayor Bebot Rodriguez.

Buot sa konsehal nga maseguro ug tan-awon ang maong mga items kon aduna bay tatak nga Import Commodity Clearance (ICC) ug Philippine Standard (PS) aron malikayan ang mga kadaot, sunog, aksidente nga posibleng moresulta sa kamatayon, ug uban pang insidente niining panahon sa kapaskohan.

Matod sa konsehal nga tinuig kini nga adunay pag-inspeksyon aron mabantayan ang pagpamaligya sa mga substandard Christmas lights subay sa RA 7394 kun Consumer Act of the Philippines ug ang paggamit ug pagpamaligya sa mga ilegal nga pabuto subay sa RA 7183 kun The Fire Crackers Law.

Sa miaging tuig, si Mayor Klarex Uy nagmugna og Task Force Firecrackers uban sa pagtambayayong sa buhatan sa Department of Trade and Industry (DTI), City Regulatory and Compliance Board (CRCB), CDO Price Coordinating Council, Bureau of Fire Protection (BFP), ug uban pang ahensya sa syudad sa pagsusi sa mga nakalapas sa maong mga balaod.

“Tungod kay ber-month naman karon, nagtuo ako nga daghang mga panimalay ang nagsugod na sa pagpamalit og mga dekorasyon samtang ang mga presyo wala pa mosaka mao nga kinahanglan kitang molihok dayon aron makontrol kini,” pamahayag ni Goking.

Ang maong taho giduso ni Bise Mayor Bebot Rodriguez ngadto sa komite sa trade and commerce ubos ni Konsehal George Goking, komite sa consumer protection ni Konsehal Jonjon Rodriguez ug sa komite sa public order and safety ni Konsehal Roger Abaday alang sa tukmang aksyon ug rekomendasyon. (RNQ/SP)

Rehabilitasyon sa drainage system sa Brgy. 33 gisuportahan sa Konseho

GILANTAW nga makunhoran ang insidente sa  pagbaha nga gakasinati  sa Barangay 33 ning syudad.

Kini human giuyonan sa Konseho sa sesyon niadtong Lunes nga gidumala ni Bise Mayor Bebot Rodriguez ang resolusyon nga nag-uli sa ordinansa  sa maong barangay nga may kalabutan sa ilang 2025 Annual Budget gikan sa Enero ngadto  sa Disyembre nga mokabat sa ₱ 3,831,519 alang sa hingpit nga implementasyon.

Nag-una sa ilang  gi-prioridad ubos sa maong budget ang rehabilitasyon   sa drainage system ug material recovery facility sa tinguha  nga  makunhoran ang pagbaha sa ilang dapit.

Gawas nini, migahin usab ang barangay og igong pundo  alang sa pagpamalit sa calamity related supplies ug alang  sa mga programa sa Sangguniang Kabataan.

Gisuportahan  ni Liga ng mga Barangay President Marlo Tabac, ang chairman sa komite sa

barangay affairs, ang maong lakang human nasuta nga nahiuyon kini sa balaod ug mahimo nang ipatuman sa labing dali nga panahon.

Ang resolusyon nga gisagop sa Konseho alang sa maong katuyoan gipaluyohan sa komite sa barangay affairs ug komite sa pamalaod ug reglamento ubos ni Konsehal Edgar Cabanlas. (JRG/SP)