Cabanlas nagpasalamat sa malampusong Araw ng Cogon

KUSGANONG nagpasalamat si Konsehal Edgar Cabanlas, majority floor leader sa konseho, sa malampusong duha ka adlaw nga selebrasyon sa ika-21 Araw ng Cogon Market sa miaging semana nga gipasiugdahan sa mga market vendors ug stakeholders.

Ang selebrasyon nagdala sa tema nga “Nagkahiusang Manininda, Lig-on nga mga Merkado, Mauswagon nga Kaugmaon.”

Sa iyang mensahe, gihatagag punto ni Konsehal Cabanlas ang pag-usbaw sa kita sa merkado tungod sa padayon nga pagpaningkamot sa buhatan sa City Economic Enterprises and Business Development Administration (CEEBDA) ug sa kooperasyon sa mga mamaligyaay ug ang kamahinungdanon sa pagmintinar sa kalimpyo sulod sa merkado isip usa ka responsibilidad sa paghatod sa dekalidad nga serbisyo publiko.

Dugtong sa konsehal nga ang maong kalihokan dili lamang usa ka ordinaryong panagtapok kon dili usa usab ka pag-ila sa mga mamaligyaay kansang kontribusyon nagpadayon sa pagpalambo diha sa lokal nga ekonomiya.

Niini si Konsehal Cabanlas hugot nga nagpasalamat sa buhatan sa CEEBDA sa panguna ni CEEBDA General Manager, Atty. Marianne G. Ragas, sa Cogon Central Market Vendors Association (COCEMVA), pinangulohan ni Presidente Joe Louie Marsamolo, sa tanang market vendors, stakeholders, ug sponsors kansang suportan miresulta sa kalamposan sa maong selebrasyon.

Ang maong kalihokan gitambongan usab nila ni Konsehal ni Eric Salcedo, chairperson sa night market management committee ug Konsehal Gilda “Gigi” Go, kinsa mipadayag sa ilang suporta alang sa padayong kalamboan sa Cogon Market. (RNQ/SP)