PADAYONG gipanday sa komite sa cooperative sa konseho ubos ni Konsehal Go ang sugyot ordinansa nga mag-establisar sa Cagayan de Oro City Employment Reform Program.
Sa tigom sa komite niadtong Miyerkules nga gitambongan sa lain laing buhatan sa lokal ug nasyonal nga kagamhanan, tagsa tagsa nilang gituki ang mga probisyon sa tinguha nga mahan-ay kini ug epektibo ang implementasyon niini.
Sumala ni Public Employment Service Office (PESO) Manager Kathleen Kate Sorilla nga mahinungdanon kaayo ang maong ordinansa apan nakabinbin kini sa taas-taas nga panahon ug siya malaumon nga kasamtangang nagdumala sa komite mahatagan na kini sa katumanan alang sa kaayohan sa katawhan sa dakbayan.
Sa iyang bahin, ang representante sa Oro Trade and Investment Promotion Center nisugyot alang pagmugna og Technical Working Group (TWG) nga maoy manguna sa pagghan-ay ug pagpanday sa maong sugyot ordinansa alang sa epektibong pagpatuman niini, butang nga gisuportahan ni Konsehal Go.
Niini, parobaleng gimugna sa komite ang maong TWG nga gipangulohan sa PESO Manager uban sa mga gitudlong mga sakop niini.
Ang maong tigom gitambungan usab sa representante sa City Legal Office, Business Permits and Licensing Division, Department of Labor and Employment –Region 10 ug Technical Education and Skills Development Authority-Misamis Oriental. (JRG/SP)
GIKA-ALARMA ni Konsehal Roger Abaday, chairman sa komite sa public safety ang sunod-sunod nga sunog nga nahitabo sa syudad diin liboan ka mga pamilya ang nawad-an sa ilang mga pinuy-anan.
Tungod niini nga panghitabo, giingon nga angayan mapangitaan sa tukmang solusyon pinaagi sa pagpatuman sa balaod subay sa Fire Code of the Philippines.
Kini ang unod sa special report ni Konsehal Roger Abaday, chairman sa komite sa public order and safety atol sa sesyon niadtong Lunes nga gidumala ni Bise Mayor Bebot Rodriguez.
Sumala ni Abaday subay sa imbistigasyon sa mga kawani sa Bureau of Fire Protection (BFP), sagad sa hinungdan sa maong sunog mao ang pagdula sa posporo og lighter sa mga minor de edad, electrical faulty wirings ingon man ang nabiyaan nga nakasaksak nga mga cellphones.
Gisugyot usab sa konsehal nga hugot ipatuman ang mga programa sama sa regular nga pagpahigayon sa fire drill sa mga kabarangayan, pag-establisar sa functional response system, ug ang paghimo sa public safety pinaagi sa pagpasabot sa mga molopyo sa mga angayan buhaton.
Nunot niini, ang maong taho ni Konsehal Abaday giduso ni Bise Mayor Bebot Rodriguez sa komite sa barangay affairs ni Konsehal Marlo Tabac, komite sa edukasyon ni Konsehal Jing Daba, komite sa panglawas ni Konsehal Paolo Gaane, ug sa komite sa public order and safety ni Konsehal Roger
Abaday alang sa dugang pagtuon ug rekomendasyon. (MLR/SP)
“It’s not about paint, streetlights, but it’s about visibility, prevention and most important it’s about protecting the lives thru simple interventions making our pedestrian lanes safer for everyone”.
Kini ang unod sa taho ni Konsehal George Christopher Goking, chairman sa komite trade og commerce atol sa sesyon niadtong Lunes nga gidumala ni Bise Mayor Bebot Rodrgiuez kalabot sa panginahanglan sa pagpalambo sa kahayag sa mga pedestrian lane sa lain-laing bahin sa dakbayan ilabi na panahon sa gabii ug ulan.
Gipasabot sa konsehal nga sa halos kada-adlaw niyang pagmaniho libot sa siyudad ilabina sa gabii, iyang namatikdan nga adunay pipila ka mga tabokanan nga lisod na kaayo makita kay napanas na ang mga marka ug adunay mga suga sa dalan nga hinay na ang kahayag niini .
“Ang tin-aw unta ug makita nga pedestrian lane makahimo og dakong kabag-ohan sa pagtabang sa mga tawo nga luwas nga makatabok ug sa pagpugong sa mga aksidente diha sa kadalanan” sumpay ni Konsehal Goking.
Si Konsehal Goking misugyot nga mahisgutan sa mga hintungdang komite sa konseho ang regular nga pagpintura sa mga pedestrian lane, ang paggamit sa mga reflective materials, pagtul-id sa mga suga duol sa mga crossings, tunghaan, simbahan, hospitals, kamerkadohan, terminals, barangay halls, tinuig o quarterly safety audits, ug mas lig-on nga koordinasyon sa mga hingtungdang buhatan aron mas mapalambo pa ang luwas nga kadalanan alang sa tanan.
Ang maong taho giduso ni Bise Mayor Bebot Rodriguez ngadto sa komite sa public works ni Konsehal Al Legaspi, Sr. ug komite sa public utility ni Konsehal Roger Abaday alang sa tukmang aksyon ug rekomendasyon. (RNQ/SP)