Pagtukod og MRF gisuportahanni Kon. Tabac

“SERYOSO apan kulang sa kapasidad ang gagmayng barangay.”

Kini ang gibutyag ni ABC President Konsehal Marlo Tabac atol sa tigom sa komite sa environment niadtong Martes nga gidumala ni Konsehal Enrico Salcedo samtang gituki ang lakang pagsulbad sa isyu sa solid waste management sa dakbayan.

Sumala ni Tabac seryoso ug interesado ang mga gagmayng barangay gikan sa Barangay 1 ngadto sa 40 nga makabaton og Material Recovery Facility apan  kulang sila sa tinubdan alang sa maong katuyoan.

Hinoon, gibutyag  sa konsehal nga ang dakong barangay nga gilangkoban sa Macasandig, Nazareth, Camaman-an ug Indahag nagcluster sa pagtukod og MRF nga ipahimutang sa Indahag, pinaagi sa  suporta ni Congressman Rufus Rodriguez.

Gidugang ni Konsehal Tabac nga kon ana-a na kini nga MRF, basin ang mga gagmayng barangay nga nakaduol sama  sa Barangay 1, 3 ug 5 mahimong maapil sa cluster didto sa Indahag. (JRG/SP)

Regulasyon sa analog, digital weighing scale tukion sa komite sa trade

MAGTIGOM karong Biernes sa alas 9:00 sa buntag ang komite sa trade and commerce ubos ni Konsehal George Christopher Goking, komite sa economic enterprises ni Konsehal Ed Cabanlas ug komite sa consumer protection ni Konsehal Jonjon Rodriguez.

Tukionsailang joint meeting ang special report ni Konsehal Goking nga tan-awon pag-usab ang mga balaod ug regulasyon bahin sa paggamit sa digital ug analog nga timbangan sulod sa kamerkadohan sa syudad.

Gipaabot nga motambong sa  tigom ang mga sakop niini, nga gilangkoban nila ni Konsehal Juancho Pascual, Yvy Emano, Paolo Gaane, Des Dahino-Resma, Kenneth John Sacala, Yan Lam Lim, Jing Daba, Gigi Go, Aga Suan, Bise Mayor Bebot Rodriguez ug ang mga hintungdang ahensya ug hepe sa mga buhatan sa City Hall aron makuha ang ilang opinyon alang sa tukmang rekomendasyon. (RNQ/SP)

Suan mipahalipay sa Mr. PYAP Bonbon candidates

“HINUMDUMI nga ang tinuod nga lider dili masukod pinaagi sa na angkong titulo apan kini gisukod sa nahuptang abilidad aron sapagdasig, panglantaw ug paghimo alang sa kabag-ohan niining kalibutana”.

Kini ang gibutyag ni Konsehal Aga Suan, minority floor leader sa konseho, atol sa Mr. PYAP Bonbon 2025 Coronation Night nunot sa kapistahan sa maong barangay.

Matod sa konsehal nga dili lamang ang kapistahan sa barangay ang gisaulog, kundi lakip nga gisaulog ang intensyon, ang gahom, ug ang talento sa kabatan-onan sa barangay.

“Usa kini ka gabii nga nagpahinumdom kanato nga kining kalihokan nagsimbolo sa bulawanon nga mga lider kay gisaulog nga puno sa garbo, gugma, katuyoan, panaghiusa sa kabatan-onan, ug sa komunidad,” dugang pamahayag ni Suan.

“To the candidates, you are all winners and congratulations!” matod ni Konsehal Suan. (RNQ/SP/Photo grabbed from Maviiboi FB page)