World Vision gipasalamatan sa Konseho

Dako ang pasalamat sa Konseho sa syudad ubos ni Bise Mayor Bebot Rodriguez sa World Vision Development Foundation sa walay puas nga pag-abag sa kagamhanan sa dakbayan dinha sa pag-amuma sa kabataan.

Kini human si Konsehal Imee Moreno, sa sesyon niadtong Lunes, mitaho sa dakong partisipasyon sa World Vision sa pagpatuman sa mga programa ug proyekto aron mahimong luwas ngalugar alang sa kabataan ang Cagayan de Oro.

Matod niya nga dalaygon ang tinguha sa World Vision nga mawagtang ang mga kaso sa child labor dinhi sa syudad ilabina nga segun sa pagtuon, ang Northern Mindanao ang adunay labing taas nga kaso sa child labor.

Gitumbok ni Moreno ang programa sa kapunungan nga Project ACE kon project Against Child Exploitation nga gipatuman dinha sa barangay Cugman, Puntod ug Gusa pinaagi sa gilagdaang Memorandum of Agreement sa milabayng tuig.

Pinaagisa World Vision nahitsas ang local nga kagamhanan dinha sa pagproteher sa kabataan. Gani, ang barangay Cugman nakamugna og Anti-Child Labor Ordinance, usa ka milestone nga mahimong masundog sa ubang mga barangay, dugang pamahayag sa konsehal.

Niini, dili ikalimod ang naamot sa grupo dinha sa programa sa kagamhanan nga maprotektahan sa hingpit ang kabataan batok sa bisan unsang matang sa pag-abuso, panapos ni Konsehal Moreno.