Annual Budget sa Brgy. 31 SK giaprobahan

Giaprobahan sa konseho ning dakbayan atol sa regular nga sesyon niadtong Lunes nga gidumala ni Acting Bise Mayor Konsehal Roger Abaday ang usa ka resolusyon nga nagdeklarang hingpit nga magamit ang tinuig nga budget sa Sangguniang Kabataan (SK) sa Barangay 31.

Ang maong tinuig nga budget nga nagkantidad og ₱405,831.00 ipundo alang sa mga programa ug serbisyo nga maghatag og kaayohan sa kabatan-onan sa maong barangay.

Nasayran nga ang pundo i-apud-apod ngadto sa lima ka importanteng prayoridad nga programa nga gilangkoban sa mga serbisyo sa panglawas ug adolescent sexual reproductive health; paghatag og patas nga access alang sa kalidad nga edukasyon; kampanya batok sa gidiling droga; pagpauswag sa katakos sa kabatan-onan; ug proteksyon sa kalikopan ug pagpahiangay sa kausaban sa klima.

Ang maong resolusyon nga gisagop sa konseho alang sa maong katuyoan gipaluyohan sa komite sa youth and sports development ni Konsehal Kenneth John Sacala ug komite sa pamalaod ug reglamento ubos ni Konsehal Edgar Cabanlas. (JRG/SP)